জীৱন উদযাপনৰ দিনবোৰ খণ্ড -২

ভূপেনক তাতে এৰি ভূপালী নাম লোৱা বৈভৱী আৰু দূবৰিয়ে নাতিদূৰতে দেখিলে সিহঁত থাকিবলগীয়া হোষ্টেল কেম্পাছৰ সেই বিশাল গেটখন। বিশাল মানে সঁচায়ে বৰ ডাঙৰ । সেই কেম্পাছত তিনিটা ছোৱালীৰ হোষ্টেল RCC 5,RCC 4 আৰু এই দুয়োটাৰে সন্মুখত দীঘলীয়াকৈ AT 10. মনত এসোপা সংকোচ , বুকুত অযুত হেঁপাহ লৈ খুলি থোৱা বিশাল গেইট খনেৰে চুচুক চামাককৈ দুয়োজনী সোমাই গ’ল কেম্পাছটোৰ ভিতৰলৈ। সোমায়েই সোঁহাতে প্ৰথমে RCC 5 girls hall. এইটো বিশ্ববিদ্যালয়ৰ আইন বিভাগৰ ছোৱালী হোষ্টেল , তাৰ পিছতে বৈভৱী থাকিবলগীয়া হোষ্টেলটো , এই দুটা দুমহলীয়া আছিল, অৱশ্যে RCC 5 টো এমহলীয়া । আৰু দূবৰি আৰু দেৱাশ্ৰী থাকিবলগীয়া হোষ্টেলটো অসম আৰ্হিৰ । এই হোষ্টেলটো বাকী দুমহলীয়া হোষ্টেল দুটাৰ সমান্তৰালকৈ আছে , দেখিবলৈ আটাইকেইটা হোষ্টেলেই ধুনীয়া । প্ৰকাণ্ড লোহাৰ গেইটখন আচলতে এই তিনিওটা হোষ্টেল থকা মস্ত কেম্পাছটোৰ সমূহীয়া গেইটহে , এইখন পাৰ হৈয়ে আকৌ প্ৰতিটো হোষ্টেলৰে নিজা নিজা চৌহদ আৰু গেইট । সিহঁতৰ বুকুকেইখন কিবা এক উত্তেজনাত ঢুক্ ঢুক্ কৈ কঁপি উঠিছিল। কলেজত পঢ়োঁতেও হোষ্টেলতে থকা যদিও ইয়াত কিবা অলপ বেলেগ বেলেগ লাগিছিল সিহঁতৰ । বিশাল কেম্পাছটো লংবনেৰে ঠাঁহ খাই আছিল, অৱশ্যে মাজে মাজে চফা কৰে বুলি গম পায় । কিন্ত্ত হোষ্টেলবোৰৰ গাইগুটীয়া চৌহদবোৰ বৰ চাফ চিকুণ আছিল, তাতে নাৰ্জী ফুলৰ বতৰ , আটাইকেইটা হোষ্টেলতে বৰ সুন্দৰকৈ নাৰ্জী ফুলবোৰ ফুলি আছিল যদিও AT 9 ৰ দৰে সিমান পৰিপাটি আৰু চালে চকুৰোৱা বিধৰ নাছিল। লংবনেৰে ভৰি থকা পকী ৰাস্তাটোৰে লাহে লাহে আৰু প্ৰয়োজনতকৈ বেছি ভদ্ৰভাৱে আমি সোমাই গ’ল সিহঁত । দুয়োজনী দুয়োটা হোষ্টেললৈকে একেলগে যোৱাৰ কথা বাটতে আলচি আহিছিল । AT 10 ৰ গেইটখনৰ ঠিক ওচৰতেই এটা PCO দেখি মনটো অলপ ভাল লাগিল গ’ল বৈভৱীৰ , কাৰণ আগতে ঘৰলে ফোন কৰিবলে আমাৰ অলপ দিগদাৰ হৈছিল , পিছে এতিয়া গেইটতে আছে যেতিয়া আৰু বৰ বেছি দিগদাৰি নহ’ব বুলি ভাবিয়েই ভাল লাগিল তাইৰ মনটো । PCO টোৰ বাহিৰতে তামোলৰ সেলেঙিৰে ওঁঠ ৰাঙলী বাইদেউ এগৰাকীয়ে সিহঁতলৈ চাই হাঁহি থকা দেখি অলপ বুকুখন পাতল লাগিল, সেইয়া ৰুণু বাইদেউ, PCO চলাই তেখেতে। বাইদেউক সুধি সিহঁত নিজৰ নিজৰ হোষ্টেলৰ গেইটকেইখনৰ আগত থিয় দিলেগৈ । AT 10 ৰ গেইট বৈভৱীৰ হোষ্টেলৰ গেইট খনতকৈ আগত পায় বাবে তাতে আগতে সোমালগৈ।পাতিবলগীয়া কথাখিনি পাতি দুয়োজনী ওলাই আহিল RCC 4 হোষ্টেললৈ , বৈভৱী থাকিবলগীয়া হোষ্টেলৈ । তাইৰ হোষ্টেলৰ Prefect সিহঁতৰে চিনিয়ৰ কটনিয়ান মণিকুন্তলা বা বুলি গম পাই এনেইও অকণমান ভাল লাগি আছিলেই , মণিবাৰ লগত তাহাঁত দুয়োজনীৰে আগৰেপৰাই অন্তৰংগ সম্পৰ্ক এটা আছিলেই বাবে ভয়ভাৱৰ পৰিমাণটো কিছু কম আছিল। AT 10 ৰ গেইটখনৰ ঠিক সন্মুখতেই RCC 4 হোষ্টেলৰ visiting room , এখন বাৰাণ্ডাৰে একোঠলীয়া ঘৰটোত তেতিয়া কাৰোবাৰ কোনোবা ভিজিটৰ আহিছিল হ’বপায় , বৈভৱীয়ে ভালকৈ চালে , গোটেই কোঠাটো ছাতি এটাৰ দৰে এজোপা ডাঙৰ কৃষ্ণচূড়াৰই ছাঁ দি আছিল, এনেই জালুকবাৰী তাতে আকৌ কৃষ্ণচূড়া তাৰোপৰি নিজেই থাকিবলগীয়া হোষ্টেলৰ বাকৰিতে…কিমান আৱেগ , কিমান ভালপোৱা… ভাবিয়েই ভাল লাগি গ’ল তাইৰ মনটো , মনত পৰিল তাইৰ ঘৰৰ পদূলিৰ কৃষ্ণচূড়াজোপালৈ । এই কোঠাটো পাৰ হৈয়ে ৫ মিটাৰমানৰ সিফালে তাইৰ হোষ্টেলৰ গেইট, গেইটখনৰ একাষে এজোপা ডাঙৰ বগৰী , বগৰীজোপাও ঠিক দেখাত ছাতি এটাৰ দৰেই । গেইটখন লাহেকৈ , প্ৰায় শব্দ নোহোৱাকৈ ঠেলি সোমাই গ’ল দুয়োজনী , দুমহলীয়া আছিল বাবেই চৌহদটো AT10 তকৈ অলপ সৰু আছিল যদিও পৰিপাটি আছিল, সোমায়েই বাঁওহাতে এখন চাইনব’ৰ্ডত ” পদ্মাৱতী দেৱী ফুকননী ৪ নং ছাত্ৰীনিৱাস /RCC 4 girls hall ” বুলি লিখা আছে , চাইনব’ৰ্ডখন নাৰ্জী ফুল এসোপাৰ মাজত সোমাই আছিল ধুনীয়াকৈ । মালী খুড়াই হয়টো ভালকৈ থৈছিল। সোমাই যোৱা বাটকণৰ দুয়োকাষে ফুলনি। তেতিয়াহে বুকুখন জোৰত ঢপঢপাবলৈ ধৰা যেন লাগিল তাইৰ , বুকুৰ মাজত বাজি থকা ঢেঁকীৰ মাতটো নিজেই শুনা যেন লাগিল। চিনাকি কাৰোবাক বাহিৰতে দেখেনেকি বুলি ইফালে সিফালে চালে যদিও কোনো ক’তো চকুত নপৰাত এতিয়া কি কৰোঁ গোপাল ক’লৈ যাঁও কৃপাল অৱস্থাত ৰৈ থাকিল দুয়োজনী । prefect ৰ কোঠা আছে ক’ত ? কেনি যায় ? একোৱেই ধৰিব নোৱাৰি ৰৈ থাকিল দুয়োজনী । ইফালে বিশ্ববিদ্যালয়ৰ হোষ্টেলবোৰত prefect ৰ মৰ্যাদা কেনে সকলোৱে জানেই। ৱাৰ্ডেন বহুত পিছতহে আহে এই পদৱীৰ(ক্ষমা প্ৰাৰ্থনাৰে ভুল হৈছে যদি), গতিকে এতিয়া মণিবাৰ ৰূম বিচাৰি ৰূমৰ কথা সুধিবলৈ যোৱাটোও ঠিক বিশ্ববিদ্যালয়ত নামভৰ্তি কৰি উপাচাৰ্যক লগ কৰিবলৈ যোৱাৰ দৰেই যেন লাগিল মনে মনে তাইৰ । কাক সুধিম বুলি ইফালে সিফালে চাই থাকোঁতেই এগৰাকী হৃষ্টপুষ্ট চেহেৰাৰ চিনিয়ৰ যেন লগা আৱাসীয়ে সিহঁতক দেখি অক্কণো পাত্তা নিদিয়া যেন দেখুৱালেও হোষ্টেলৰ কাৰণেই গৈছে বুলিয়েই গম পাই হ’বলা কেৰাহীকৈ এপাক চালে। সেই সুবিধাকণ কোনোমতে এৰি নিদিয়াকৈ বৈভৱীয়ে ঘপকৈ সুধিয়েই পেলালে prefect ৰ ৰূম কোনফালে বুলি , নতুন মুৰ্গা দেখি গহীন গম্ভীৰ চিনিয়ৰ বাগৰাকীৰ চাগে মনটো ভালেই লাগিল, মণিবাৰ 2nd block ত থকা ৰূমটো দেখুৱাই দিলে । তেঁও বটাই দিয়াৰদৰেই মণিবাৰ ৰূমত সোমালগৈ যদিও মণিবায়ে আৰু এমাহমানৰ পিছত হে ৰূম খালী হ’ব বুলি ক’লে, মণিবাৰ লগতে কটনৰে চিনিয়ৰ চিন্ময়ীবাক দেখি ভয় লাগিল বৈভৱীৰ , চিন্ময়ীবালৈ সিহঁতে আগৰেপৰাই ভয় কৰে , মণিবায়ে এমাহমান দেৰিকৈহে ৰূম পাব বুলি কোৱাত বৈভৱীয়ে বেয়াও পোৱা নাই অলপো পিছে। বেয়া নোপোৱাৰে কথা । কাৰণ ইতিমধ্যেই লংকেশ্বৰৰ মলয় দাস দাদাৰ ঘৰত এমাহৰ ভাড়া দিছেই, তাতে তাত থাকি ভালো লাগিছে। আছিলো একদম সাতঘাটৰ চেঙেলীকেইজনী একেলগে। এমাহৰ পিছত ৰূম পাব বুলি নিশ্চিত হ’ল যদিও ৰূমমেট পিছে আহিলেহে গম পাব বুলিও কৈ পঠিয়ালে। অহা বাটেৰেই বাট বুলিলে সিহঁতে , পিছে চিনিয়ৰ চিনিয়ৰ লগা বাকেইগৰাকীমানৰ মুখ কেইখন দেখি অলপ ভয় খাইও আহিলে , তথাপিও কিবা এক সুকীয়া অনুভৱ লৈ হোষ্টেল কেম্পাছটোৰপৰা ওলাই আহিল যদিও AT 9 ৰ বাঘকেইটাৰ আগেদি যেনেতেনে ওলাই আহি দুয়োজনীয়ে এট স্বস্তিৰ নিশ্বাস এৰিলে , যেন ডাঙৰ ইন্টাৰভিউ এটা দিহে ওলাই আহিলে , নজনাকৈয়ে দুয়োজনীয়ে হাঁহি উঠিলে একো কাৰণ নোহোৱাকৈয়ে । ল’ৰাবোৰে ভলীবল খেলাত মগ্ন বাবে সিহঁতক ঘুৰি আহোঁতে বৰকৈ মন নকৰিলে হয়তো, কিন্ত্ত বৈভৱীৰ মনটোৱে ভুপেনক লগ পাবলৈ অকণমান হেঁপাহ নকৰাকৈ থকা নাছিল । বৰষুণকো আওকাণ কৰি বৈভৱী ঢাপলি মেলিছিল লংকেশ্বৰৰ আপোন ৰূমটোলৈ ,তাত যে ৰৈ আছে পলি, দেৱাশ্ৰী, তিৰু আৰু অমৃতা , সিহঁতক আদ্যোপান্ত বিৱৰি ক’লেহে মুখৰ খজুৱটি মৰিব তাইৰ , পিছে সিহঁত কেইজনী গৈ নোপোৱাত বিচনাতে বাগৰি তাই খিৰিকীৰে উপভোগ কৰি থাকিলে বৰষুণ । সিহঁতে একেলগে দুটা ৰূম লৈছে , এইকেইদিনতে সিহঁত আৰু বেছি কাষ চাপি গৈছে ইজনী সিজনীৰ , দিনৌ আড্ডা , প্ৰতি সন্ধ্যা গান আৰু কবিতাৰ মেহফিল , লগত দেৱাশ্ৰীৰ হাতৰ সুস্বাদু আহাৰ ….আঃ কিযে সুঘ্ৰাণ খানাৰ। তাতে ঘৰটোৰ টিউৱৱেলৰ পাৰ আৰু পাকঘৰৰ কাষৰ অভিজ্ঞান ল’ৰাৰ হোষ্টেলটো আটাইতকৈ আকৰ্ষণৰ কেন্দ্ৰবিন্দু সিহঁতৰ বাবে ।